ကြားဖြတ်ရွေးကောက်ပွဲမှာ အနိုင်ရတာဟာ ခေတ်သစ်တခုရဲ့ အစပဲဖြစ်ပါတယ်လို့ အမျိုးသားဒီမိုကရေစီ အဖွဲ့ချုပ် NLD ပါတီခေါင်းဆောင် ဒေါ်အောာင်ဆန်းစုကြည်က ပြောလိုက်ပါတယ်။ ပြည်သူတွေရဲ့ အားပေး ထောက်ခံမှုကြောင့် အခုလို အောင်နိုင်မှု ရတာ ဖြစ်တဲ့အတွက် အောင်မြင်မှုအတွက် ၀မ်းသာတဲ့နေရာမှာ ထိန်းထိန်း သိမ်းသိမ်း ရှိရမယ်လို့လည်း NLD ပါတီဝင်တွေကို သတိပေးခဲ့ပါတယ်။ အပြည့်အစုံကို ရန်ကုန်မြို့ကနေ ကိုကျော်ကျော်သိန်းက သတင်းပေးပို့ထားပါတယ်။

ဧပြီလ ၁ ရက်နေ့ကကျင်းပခဲ့တဲ့ ကြားဖြတ်ရွေးကောက်ပွဲမှာ ရာနှုန်းပြည့်နီးပါး အနိုင်ရခဲ့ပြီးတဲ့ နောက်တရက်မှာပဲ ဒေါ်အောာင်ဆန်းစုကြည်က အဲဒီလိုပြောလိုက်တာပါ။ ဧပြီလ ၂ ရက်နေ့ မနက်ပိုင်းက ရန်ကုန်မြို့၊ ဗဟန်းအရပ်က NLD ပါတီ ရုံးချုပ်ကို ဒေါ်အောင်ဆန်းစုကြည် သွားခဲ့ပြီး အဲဒီနေရာတ၀ိုက် အပြည့်အကျပ် စောင့်နေကြတဲ့ လူထုပရိသတ်နဲ့ သတင်းမီဒီယာသမား အများအပြားကို ပြောခဲ့တာ ဖြစ်ပါတယ်။

“ဒါဟာ ခေတ်သစ်တခုရဲ့ အစပျိုးမှုလို့ ကျမတို့ မျှော်လင့်ပါတယ်၊ အဲဒီ နောက် ကျမတို့တိုင်းပြည်ရဲ့ နေ့တဓူဝ နိုင်ငံရေးမှာ လူထုရဲ့အခန်းကဏ္ဍကို ပိုပြီး အာရုံစိုက်နိုင်မယ်လို့ မျှော်လင့်ပါတယ်” လို့ ဒေါ်အောင်ဆန်းစုကြည်က ပြောပါတယ်။